Posible nga magatambong lang via online si President Rodrigo Duterte sa national convention sang Partido Demokratiko Pilipino–Lakas ng Bayan (PDP-Laban) sa Pampanga.
Suno kay Presidential Spokesperson Atty. Harry Roque, may posibilidad nga personal nga magapadulong si Duterte sa nasambit nga convention apang bangud sa pila ka mga konsiderasyon, mahimo man nga ”virtual” lang ang mangin attendance sang presidente.
Nahibaluan nga masobra 400 ka myembro sang PDP-Laban ang ginalauman nga personal nga magatambong sa national convention.
Ginalauman man ang anunsyo sang ruling party subong nga adlaw sang mga ngalan sang kandidato para sa 2022 national elections.
Una na nga ginpasigurado ni Department of the Interior and Local Government Undersecretary Jonathan Malaya nga indi mangin “superspreader” ang ila pagtililipon bangud man sa pagdoble sang ila ginapatuman nga health protocols batok sa COVID-19.
Ang tanan nga magatambong sa convention ang kinahanglan nga fully vaccinated batok sa COVID-19 kag may negative nga swab test result 48 oras antes ang event.
