ILOILO CITY- Ginapamatud-an sang mga manunudlo nga indi magtahaw ang ila katuyuan nga magdul- ong sang edukasyon sa kabataan sa pihak sang pandemya kadungan sang pagbukas sang school year 2021-2022.
Sa interview sang Bombo Radyo kay Errol Sobredo, Master Teacher sa Molo 1 Elementary School, iya ginpahayag nga sa ikaduha nga tuig nga ginapatuman ang blended learning sa pungsod, nangin mabudlay ang ila sitwasyon apang wala sila sang mahimo kundi nga atubangon ini.
Gintuad naman ni Sobredo nga sa una nga adlaw sang pagbukas sang school year, may mga estudyante sa gihapon nga wala pa nakapa-enrol apang padayon ang pagbaton sang eskwelahan sang late enrollees.
Sa subong, may yara pa lang sa 610 ang nakapaenrol na humalin sa Kinder tubtob sa Grade 6.
Naplastar naman ang schedule sang tagtaganay sang mga printed modules para sa mga estudyante.
May kaangtanan naman sa ila ginpatigayon nga opening program, nangin virtual lamang ini kag wala man gin-require ang mga estudyante nga mag-attend bangud sa konsiderasyon nga indi tanan ang may yara sang internet connection.
May ginapatuman naman nga protocol ang buluthuan kon sa diin 50% sang faculty and staff ang naga-work from home kag ang 50% naman ang physically present sa eskwelahan.
