ILOILO CITY- Ginkumpirmar ni Iloilo Governor Arthur Defensor Jr. nga magaupdanay sila ni Vice Governor Christine Garin para sa May 2022 elections.
Sa interview sang Bombo Radyo kay Governor Defensor, iya ginpahayag nga apisar nga yara siya sa idalom sang Partido Demokratiko Pilipino-Lakas ng Bayan (PDP-Laban) kag sa idalom sang Nacionalista Party naman si Garin, ila nasugilanunan nga mag-updanay nalang kag indi na siya magbutang sang kandidato nga magakontra kay Garin sa pagka-bise gobernador.
Suno kay Defensor, nahisugtan man nga wala siya sang ibutang nga kandidato halin sa iya partido nga magapadalagan sa pagka-kongresista sa mga distrito sa probinsya.
Gin-athag naman sang gobernador nga sa pihak sang mga negosasyon kag posible nga matabo ang mga uncontested elections sa probinsiya, hilway sa gihapon nga magpadalagan ang bisan sin-o nga luyag mangin kandidato.
