Ginpa-Bombo sang isa ka vaccinee ang management sang vaccination site sa Megaworld.
Sa interview sang Bombo Radyo kay alyas Gina, residente sang syudad sang Iloilo, iya ginpahayag nga humalin sang nagsugod ang pagpabakuna tubtob matapos, wala gid sang bukas nga Comfort Room (CR) sa nasambit nga vaccination site.
Makaluluoy man suno sa iya ang mga Persons with disablity (PWD) nga luyag kuntani maggamit sang CR apang wala gid sang bisan isa nga bukas.
Nagpanawagan man ang natungdan sa Iloilo City Government nga hatagan man sang nagakaigo nga solusyon ini nga isyu.
Gilayon nga gin-aktuhan sang COVID-19 Team sang Iloilo City Government ang nasambit nga reklamo nga ginpalab-ot sa Bombo Radyo.
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad, iya ginpahayag nga gintawagan na nila ang tanan nga vaccination sites sa syudad sang Iloilo agud ma-address ang isyu.
Suno kay Conlu, nahangpan nila nga tuman ka importante ang CR para sa pumuluyo ilabi na para sa mga PWD ukon mga pumuluyo nga indi physically fit kag halos indi makahulag sang normal.
Positibo man suno sa iya ang nangin feedback sang management sa kada vaccination site.
Ginpasalig man ni Conlu nga padayon ang ila pagtinguha nga mapabilin ang matalunsay nga pagpabakuna kag mapatuman ang tanan nga health protocols.
