Hugot nga ginaduso ni Iloilo City Mayor Jerry Treñas nga mahatagan sang booster shots ang mga frontliners kag mapabakunahan batok sa COVID-19 ang mga menor de edad.
Sa interview sang Bombo Radyo kay Mayor Treñas, iya ginpahayag nga nagakadapat nga madugangan ang proteksyon sang mga frontliners ilabi na ang mga medical personnel nga naga-atubang kag naga-atipan sa mga COVID-19 patients.
Suno kay Treñas, naga-umpisa naman ang vaccination para sa mga menor de edad sa nanuhay-tuhay nga pungsod sa iban nga bahin sang kalibutan gani nagakadapat lang ma-umpisahan naman ini sa Pilipinas kag sa syudad sang Iloilo.
Importante ini suno sa alkalde ilabi na nga maga-umpisa na ang pilot implementation sang face-to-face classes.
Diri sa syudad pahayag ni Mayor Treñas, halos 100 ka porsyento sang mga manunudlo halin sa pampubliko kag pribado nga buluthuan ang nabakunahan na batok sa COVID-19.
Samtang, ginpat-od man sang alkalde nga sa subong, bastante ang suplay sang COVID-19 vaccines sa syudad.
