ILOILO CITY– Trahedya ang nagsugata sa una nga adlaw sa trabaho sang kabulig sang babaye nga nasapwan nga patay sa sulod sang salakyan sa Sta. Barbara, Iloilo.
Ang biktima amo si Claire Diergos, 36 anyos, residente sang Dagsaan, Buenavista, Guimaras apang nagaistar sa Deca Homes sa Pavia, Iloilo.
Sa interview sang Bombo Radyo kay Rodelyn Sumbong sang New Lucena apang tumandok sang Barotac Nuevo, Iloilo, kag timbang sang biktima, iya ginpahayag nga sang Domingo, Oktubre 24, amo ang una nga adlaw niya bilang kabulig kun sa diin ginsugat pa siya ni Diergos sa Tagbak, Jaro.
Suno kay Sumbong, upod ni Diergos ang iya 3 ka tuig nga anak kag isa ka abyan nga babaye kun sa diin naglagaw pa ang mga ini sa Oton antes nagpauli sa Pavia apang nagpabilin sa Oton ang ginatumod nga abyan.
Pahayag sang kabulig, Oktubre 25, Lunes sang kaagahon, natingala nalang ini nga wala na sa balay ang iya employer tubtob nga nakit-an nalang ini kahapon nga wala na sang kabuhi kag puno sang pilas tuga sang pagkabuno kag naputos pa ini sa habol kag comforter.
Wala naman sang matudlo ang timbang sa kun sin- o ang posible may kahimuan sang krimen bangud gid lang niya nakilala ang biktima.
