GLASGOW SCOTLAND – Nagpromisa ang masobra 100 ka world leaders nga tapuson na ang deforestation sa 2030.
First major deal ini sang mga lider sa ginpatigayon nga 2021 United Nations Climate Change Conference o (COP26).
Lakip sa asignatories ukon nagsugot sa amo nga deal amo ang pungsod Brazil — lugar kun sa diin madata ang pagpang-utod sang kahoy sa tuman ka lapad nga bahin sang Amazon rainforest.
Lakip man sa mga nag-pledge amo ang Canada, Brazil, Russia, China, Indonesia, kag Democratic Republic of the Congo, US, kag UK nga nagacover sang 85% sang kagulangan sa bilog nga kalibutan.
Gin-welcome sang mga eksperto ang amo nga deal, apang nagpahayag nga sang 2014, may kaangay man nga deal nga ginhimo apang napaslawan man nga pahagon-haganon ang deforestation.
Ang ginapang-utod nga mga kahoy ang naga-contribute sa climate change bangud gina-deplete sini ang kagulangan nga amo ang naga-absorb sang daku nga amount sang warming gas nga carbon dioxide.
Suno kay UK Prime Minister Boris Johnson, nga amo ang host sang global meeting sa Glasgow, Scotland , 110 na subong ukon mas madamo nga leaders ang nagkomiter ukon naghimo sang amo nga “landmark” commitment.
Ang duha ka semana nga summit sa Glasgow, Scotland ang ginakabig crucial agud makontrol ang climate change.
