Wala sang problema para sa Committee on Environment sa Iloilo City Council ang pagpangbutang sang mga posters sang mga pulitiko sa palibot sang syudad sang Iloilo.
Sa interview sang Bombo Radyo kay Iloilo City Councilor Ely Estante, chair sang amo nga committee, iya ginpahayag nga indi pagpangkakason ini nga posters kag tarpaulin basta yara lang sa husto nga lugar.
Gin-reiterate sang konsehal nga indi pwede itapik ang posters sa mga kahoy kag plaza.
Pwede man ini nga itapik sa private places kaangay sa mga balay basta may yara lang sang pahanugot nagikan sa tag-iya sang puluy-an.
Una naman nga nagpahayag ang alkalde sang syudad nga bisan suportado sini ang presidential bid ni Vice President Leni Robredo, welcome sa syudad ang bisan ano mga political party.
Sandig naman sa statement sang Comelec, wala pa sang legal prohibitions sa mga aspirant bangud wala naga-apply ang election rules sa would-be candidates kundi sa candidates lamang.
Ang candidates ang pwede lamang ma-recognize sa mismo pagsugod sang campaign period.
Sandig sa Resolution No. 10695 sang Comelec, ang campaign period sa 2022 elections amo ang masunod:
* Pebrero 8 tubtub Mayo 7, 2022 para sa national positions
* Marso 25, 2022 tubtub Mayo 7, 2022 para sa local candidates
