Sa pihak sang COVID-19 pandemic, natigayon sa gihapon nga makatapos ang 763 ka mga mangunguma sang school-on-air program sang Department of Agriculture Western Visayas (DA-WV).
Ini ang ginabug-usan sang 450 ka mga mango growers kag 313 ka mga corn, cassava, kag sorghum farmers halin sa Iloilo kag Guimaras.
Ang tatlo ka bulan nga on-air course ang ginalakipan sang nagkalain-lain nga pamaagi sa pagpanguma halin sa production, pest kag diseases management, harvesting kag post-harvest topics sa diin ginalauman nga ipatuman ini sang mga farmer-graduates sa ila mga lugar agud mapataas ang ila produksyon kag profits.
Suno kay Regional Information Officer kag school-on-air host James Earl Ogatis, ang DA-WV ang padayon nga nagapaninguha nga maghatag sang nagakaigo nga impormasyon sa pagpanguma gamit ang nagakaigo nga impormasyon kag tekonolohiya agud mapasanyog ang produksyon kag kita sang mga mangunguma.
“The school-on-air is one that we can communicate with our farmers and thoroughly discuss with them modern farming practices with our DA technical experts in the distance learning through radio,” pahayag ni DA-WV RIO Ogatis.
Mismo si DA-WV regional executive director Remelyn Recoter ang nagkumpirma sa 763 farmer graduates kadungan sang culminating activity nga ginpatigayon sa MO2 Westown Hotel, Iloilo City.
Ginpasalamatan man ni Recoter ang mga mangunguma sa pagpasakop sa distance learning.
“On behalf of the Department of Agriculture and our Secretary William Dar, daku gid ang amon pasalamat sa aton mga mangunguma nga sa tunga sang pandemya padayon gihapon kamo nga naga produkto kag naga-contribute sang seguridad sang pagkaon sa Western Visayas,” pahayag ni Recoter.
