Naghingyo si Iloilo City Mayor Jerry Treñas sa National Inter-Agency Task Force (IATF) nga pahanugutan na ang paghatag sang booster shots sa tanan nga sektor.
Sa interview sang Bombo Radyo kay Treñas, iya ginpahayag nga importante subong ang dugang nga proteksyon nga mahatag sang booster shot ilabi na bangud may pamahog naman sang Omicron, ang bag-o nga variant sang Covid-19.
Sa subong, ang ginahatagan pa lang sang booster shot sa syudad amo ang mga may comorbidities, mga senior citizens, frontline health workers, kag essential workers.
Magluwas sini nga hingyo, nag-request man ang alkalde nga tugtan na nga mabakunahan ang mga indibidwal nga nagaedad 5-11 anyos.
Nalab-ot na sang syudad ang herd immunity kag madamo naman nga menor de edad nga nabakunahan suno sa alkalde apang nagaedad pa lang 12 anyos pasaka.
Ang pagbakuna sa kabataan ang kabahin suno sa iya sa pagpanghanda sa pagbalik sang face-to-face classes. ##
