ILOILO CITY- Ginliab, ginkuga, gintayaan pusil kag ginpahog nga patyon–ini ang alegasyon ni Rudelyn Sumbong nga ginhimo sa iya ni PLt. Col. Jonathan Pinuela.
Si Sumbong ang isa sa mga suspek sa Claire Diergos Murder Case kag una na nga ginpasakaan sang kaso nga murder samtang si Pinuela ang spokesperson sang Special Investigating Team angot sa kaso ni Diergos.
Sa interview sang Bombo Radyo kay Sumbong, iya ginpahayag nga sang nagligad nga Nobyembre 2021, ginpadulungan siya sang mga katapo sang Iloilo Police Provincial Office sa puluy-an sang iya paryente nga iya ginatiniran sa Brgy. Tacdangan, Cabatuan, Iloilo.
Suno kay Sumbong, ginpasakay siya sa salakyan sang IPPO kag apisar una ini nga nagpamalibad, ginpasiguro sang pulis nga safe siya rason nga nag-upod ini.
Samtang sakay sa salakyan, diri na kag ginpaako siya ni Pinuela tuhoy sa iya kahilabtanan sa krimen apang nanindugan ni Sumbong nga wala ini sang ihibalo.
Santo sa iya alegasyon,didto na siya ginliab, ginkuga, gintayaan sang armas, kag ginpahog ini ni Pinuela nga i-salvage, higtan sa kamot kag ihulod sa banglid.
Makaligad ang pila ka minutos, ginpapanaog siya sa salakyan apang ginpabalik man ini sa sulod kag gindul-ong balik sa balay sang iya paryente.
Pahayag ni Sumbong, bangud sa natabo, na-trauma gid ini kag halos indi na mapahamtang rason nga iya nadesisyunan nga isugid ang natabo sa iya kag ginaplanuhan pa kun ano ila mangin masunod nga tikang batok sa pulis.
***SABAT SANG PULIS***
Hugot ng ginpanginwala ni Police Lt. Col. Jonathan Pinuela ang alegasyon ni Rudelyn Sumbong,isa sa mga suspek sa Claire Diergos Murder Case nga gintayaan ini sang pusil, ginkuga kag ginpahog nga ipa-salvage kun indi ini magtuad sang iya nahibaluan tuhoy sa natabo sa kamatayon ni Claire Diergos.
Sa interview sang Bombo Radyo kay Police Col. Adrian Acollador, director sang Iloilo Police Provincial Office (IPPO), iya ginpahayag nga nagsugilanon sila ni Pinuela may kaangtanan sa panumbungon ni Sumbong.
Suno kay Acollador, ginapanindugan ni Pinuela nga kun natabo gid man ang akusasyon ni Sumbong, kuntani ginreport na niya ini sa kapulisan sadto pa.
Dugang pa sang IPPO Director, nagpahayag sang kahandaan si Pinuela kun desidido nga magpasaka sang kaso batok sa iya si Sumbong.
