Nag-guwa sa report sang isa ka international marine conservation group nga ang mataas nga demand sang seafood sa Estados Unidos ang naga-resulta sa iligal nga pagpangisda sa lain-lain nga mga pungsod sa kalibutan lakip na sa Pilipinas.
Suno sa grupo nga Oceana, naga-import ang US sang $2.4 billion ukon P122.8 billion nga balor sang seafood paagi sa illegal, unreported and unregulated (IUU) fishing sang 2019.
Ginpahayag sang Oceana nga resulta ini sang ginabanta 60 percent sang seafood products nga gina-import sang US nga indi covered sang Seafood Import Monitoring Program (SIMP), nga amo kuntani ang naga-require sang catch documentation kag traceability requirements para sa imports.
Suno sa amo nga report, ang blue swimming crabs ukon alimasag halin sa Pilipinas ang accounted sa halos one-fourth sang kabug-usan nga IUU wild-caught products nga gina-import sa US sang 2019.
Sandig man ini sa data sang International Trade Commission.
Ang Seafood fraud ang common sa blue swimming crab bangud mas barato ang crab nga gina-import sa Estados Unidos ipaanggid sa presyo sang crab nga didto mismo sa ila nga pungsod.
Gin-cite sang Oceana ang banwa sang Concepcion sa Northern Iloilo nga amo ang main sources sang blue swimming crabs sa Pilipinas.
Diri man nga banwa nahamtang ang isa sa duha ka crabs picking and processing plants sa northern Iloilo.
Ginpahayag sang marine protection group nga ang iligal nga aktibidad sa Concepcion ang naga-contribute sa overexploitation sang blue swimming crab nga amo ang makabig pamahog sa palangabuhian kag food security sang mga Pilipino nga naga-depende lang sa pagpangisda.
