Madamo sang mga Election offenses nga posible nga makomiter sang mga kandidato kag mga botante samtang nagapadayon ang pagpangampanya ilabi na sa nagahilapit nga May 2022 election.
Sa interview sang Bombo Radyo kay Atty. Joenar Pueblo, Bombo Abogado, iya ginpahayag nga base sa omnibus election code nakasaad ang masobra 24 ka mga offenses nga ginakomiter sa tagsa ka eleksyon.
Apang, suno kay Pueble ang major kag common election offense nga masami makomiter amu ang vote buying kag vote selling.
Yari ang mga nagkalain-lain nga sahi sang vote buying kag vote selling:
- paghatag ukon pagbaton sang kwarta
- paghatag ukon pagbaton ‘in kind’ kaangay na lang sang mga ginapanagtag nga balde nga masami may unod nga groceries ukon bugas
- pagpromisa (halimbawa sini ang mga panugyan sang mga kandidato sa publiko kabaylo sang ila nga boto)
Makabig man nga vote buying kag vote selling ang ‘conspiracy to bribe voters’ (ini amu ang pagpustahanay sa mangin resulta sang eleksyon ukon pagpamahog sa mga kaupdanan agud nga botohon ang imo natuyuan nga kandidato)
Suno kay Atty Pueblo, ang tanan nga bagay nga may yara sang balor nga nagalibot sa tunga sang kandidato kag botante ang makabig nga vote buying.
Nahibalu-an nga ang vote buying ukon selling ang ginadumilian sa idalom sang Omnibus Election Code sa diin ang politiko nga magalapas sini ang mahimo nga mangatubang sang penalidad nga indi magnubo sa isa ka tuig kag indi maglapaw sa anom ka tuig nga pagkapreso, may yara sang perpetual disqualification to hold public office, kag pag-kuha sang iya kinamatarung nga magboto.
Kun ikaw nagapadalagan, mahimo ka man nga makabaton sang petition for disqualification.
Ano man nga political party nga mapamatud-an nga guilty sa amu nga election offense ang kinahanglan nga magbayad sang multa nga indi magnubo sa P10,000.
