Napatay bangud sa COVID-19 ang isa ka Overseas Filipino Worker (OFW) nga nagatrabaho sa HongKong.
Ini amu si Magelyn Distor Handoy, 53 anyos, tumandok sang Panit-an, Capiz kag masobra 10 na ka tuig nga nagatrabaho sa HongKong bilang isa ka domestic helper.
Suno kay Bombo International Correspondent Jing Gabiazon– direkta sa Hongkong, gindala sa ospital si Handoy sang Pebrero 26 bangud sa nabatyagan sini nga sakit sa iya tyan.
Nakagwa ini sa ospital makaligad ang isa ka adlaw.
Liwat ini nga gindala sa ospital sang Marso 5 bangud nabudlayan ini magginhawa.
Didto na kag nahibaluan nga positibo ini sa COVID-19.
Marso 6 sang ini ang nagtaliwan.
Suno kay Gabiazon, base sa pagsulundan sa Hong Kong, kun napatay bangud sa COVID-19 ang isa ka Pilipino, kinahanglan nga i-cremate ini antes ipadala sa Pilipinas.
