Ginaduso sang isa ka mamalidha nga kuhaan sang pondo sang Philippine Athletics Track and Field Association (PATAFA) kasunod sang indi sini pag-endorso kay Pinoy Olympian kag world number 5 EJ Obiena nga makahampang sa World Indoor Championships (WIC).
Suno kay Puwersa ng Bayaning Atleta (PBA) party-list Representative Jericho Nograles, dapat nga utdon sang Philippine Sports Commission (PSC) ang suporta sini sa PATAFA bangud ginapahayag nga ginauyangan sini ang buwis nga ginabayad sang tawo.
Pahayag pa sang mamalidha, dapat nga i-direkta na lang sang foundations kag private institutions ang ila suporta nga ginahatag sa mismo track and field athletes sa baylo nga i-fund pa ini ukon ihapit sa PATAFA.
Ginpahayag pa ni Nograles nga ang indi pag-endorso sang PATAFA kay Obiena sa isa ka daku nga sahi sang hinampang ang nagapakita lang nga wala ini sang labot sa best interest sang Philippine sports.
Ginhingyo man sang mamalidha sa government institutions kaangay sang Philippine Amusement and Gaming Corporation (PAGCOR) kag sa Philippine Charity Sweepstakes Office (PSCO) nga untaton na ang pagsuporta sa PATAFA. ##
