ILOILO CITY- Apisar sang tuman ka subol nga tiempo nga ginhatag sang Department of Interior and Local Government (DILG),nahingagaw sang Local Government Unit sang Miagao ang pagpasa sang listahan sang mga tricycle drivers nga mangin benepisyaryo sang ayuda sa idalom sang Pantawid Pasada Program.
Sa interview sang Bombo Radyo kay John Nocal, municipal administrator sang Miagao, Iloilo iya ginpahayag nga Marso 17 nila na nabaton ang memorandum halin sa DILG kag kutob Marso 19 man ang ginhatag nga deadline.
Suno kay Nocal, apisar holiday sang Marso 18, ila ginpasa ang listahan sang 950 ka mga posible benepisyaryo.
Pahayag niya, bangud sa kakulang sang oras, ginbase nalang nila ang listahan sa data sang Municipal Council rason nga nahingagaw ang pag-email sang listahan sang tricyle drivers nga hatagan sang P6,500 nga fuel subsidy kun ini ang madayon.
Samtang, nagalaum ang mga grupo sang mga tricycle drivers sa Leganes, Iloilo nga magtupa ang ayuda sa idalom sang Pantawid Pasada Program.
Sa interview sang Bombo Radyo kay Jonathan Balbona,Presidente sang Gintas, Bigke,Camangay Tricycle Owners and Drivers Association (GBCTODA), iya ginpahayag nga sa ila asosasyon, kapin 60 ang nalakip sa listahan nga mangin benepisyaryo.
Suno kay Balbona, nalipay siya bangud sa sulod sang duha na ka tuig nga pandemya kag gindugangan pa subong sang fuel crisis, mahatagan na gid man sila sang ayuda.
Matandaan nga una na nagpahanumdom si Board Member Ramon Sullano, chairman sang Committee on Transportation sa Sangguniang Panlalawigan, sa mga tricycle drivers nga wala pa nakahibalo nga may yara man sang ayuda para sa ila nga magpadulong sila sa ila Municipal Social Welfare and Development Office (MSWDO) kag magpamangkot kun ano ang mga kinahanglan nga inugpasa.
