Nagreklamo ang mga residente sa Zone 3, Barangay Salvacion Habog-habog, Molo, Iloilo City bangud sang nagahilay nga poste sa ila nga lugar kag sa mga kuntador nga tama ka nubo kag halos mabunggo na sa ulo sang mga tawo nga nagalabay.
Suno sa isa sa mga tagreklamo nga si former punong barangay Thelma Delfin, nagaduko na lang sila kun maglabay sa amo nga mga kuntador kag delikado pa gid ini para sa mga bata nga nagahampang sa paglab-ot lab-ot sini.
Ginpangabay ni Delfin sa MORE Power nga aktuhan na ini nga problema antes pa man magluntad ang sunog sa ila nga lugar.
Suno naman kay Punong Barangay Nelson Muñoz, madugay na niya nga ginpalab-ot sa MORE Power ang amo nga concern apang wala pa gihapon sang sabat.
“Sang una sang gapasulod kag gapangaluyag pa lang sila sa amon nga mga kapitan, siling nila kakason nila ang tanan nga spaghetti wires. Subong gani, ano na ni? Indi na ni spaghetti ah, sotanghon na ni ya!,” suno sa kapitan.
Ginpahayag man sini nga pati mga bisita sa ila nga barangay, nagaduko-duko man kun mag-agi sa amo nga poste kag sa mga kuntador.
SABAT SANG MORE POWER
Sa interview naman sang Bombo Radyo kay Joy Fantilaga, spokesperson sang MORE Power Customer Care Department, iya ginpahayag nga nahatag na ang work order sa contractor kag natalana na nga kay-uhon ang amo nga problema.
Gin-ako sini nga may delay gamay sa ila nga trabaho apang naka-inspect na ang team suno kay Fantilaga kun ano ang islan sa amo nga zona.
Tatlo ka poste ang kalay-uhon suno sa iya, kag itapik man sang maayo ang mga kuntador sa kontreto na nga poste.
Ginpasalig sang More Power nga umpisahan na ang pagkay-o sini antes matapos ang bulan sang Marso.
Ginpahayag man sini nga may mga ginpang-summon sa amo nga barangay bangud naga-jumper ukon iligal nga naga-connect sa kuryente kag wala man nagabayad sang bill sa power distribution utility. ##
