Nagdangat sa ginabanta P180,000 ang balor sang halit nga ginbilin sang sunog sa isa ka residential area sa Barangay Tanza Timawa Zone II, Iloilo City Proper kagab-i.
Sa rekord sang Iloilo City Fire Stattion, 35 tanan ka mga puluy-an ang nahalitan: 22 diri ang totally damaged, 13 ang partially damaged.
Sa interview sang Bombo Radyo kay Fire Chief Inspector Publio Ploteña, Iloilo City Fire Marshall, iya ginpahayag nga ginaimbestigaran pa subong ang rason kun ngaa nag-umpisa ang sunog.
Ginatudlo nga sa balay nanday Rene Recopelacion naghalin ang kalayo.
Pareho ang sitwasyon sa amo nga lugar kag sa Barangay Airport, Mandurriao, Iloilo City (nasunugan man sang nagligad pa nga semana) nga mabudlay sudlon sang mga bombero bangud nga dikit-dikit ang mga balay kag makitid ang alagyan.
Ang apektado nga mga residente ang temporaryo nga nagatinir sa Rizal Elementary School. ##
