May pila ka jeepney operators sa syudad sang Iloilo nga wala nakahingagaw sa pag-kumpleto sang ila pag-proseso para sa Pantawid Pasada cards kag wala pa nakakuha sang fuel subsidy antes ginpatuman ang Commission on Elections (COMELEC) ban sang nagligad nga Marso 25.
Sa interview sang Bombo Radyo kay Mr. Boyet Parcon, presidente sang Iloilo City Loop Alliance of Jeepney Owners and Drivers Association (ICLAJODA) kag chairperson sang Western Visayas Transport Cooperative, iya ginpahayag nga nangin uyaya lang ang iban nga operator rason nga “kuwarta na kuntani, apang nangin bato pa.”
Hulat-hulaton lang suno kay Parcon nga matapos ang elections ban sa Mayo.
Kun basehan ang statement sang LTFRB central office, ginapahayag nahatag na ang P6,500 nga subsidiya para sa 117,000 ka public utility jeepeny units out of a total nga 264,000 units sa bilog nga pungsod antes nga nag-take effect ang ban.
Sandig ini sa Comelec Resolution 10747 kun sa diin ginadumilian ang paggasto sang public funds halin sang Marso tubtub sa Mayo 8, 2022, nga amo ang 45-day campaign period para sa local elective officials.
Magluwas sa fuel subsidy suno kay Parcon, ginalauman man sang mga driver ang pagbalik sang service contracting scheme kun sa diin mahimo makatanyag sang Libre Sakay ang mga jeep kag ang gobyerno ang mabayad sa mga transport operators and cooperatives.
Apang ang pondo diri ang nasakop man sa elections spending ban.
Una na nga ginpahayag sang LTFRB nga nag-apply na sila sang exemption sa Comelec ban kag kun mabaton na ang approval, gilayon nga ipatuman liwat ang amo nga programa.
