Apisar ginpakamalaot anay si US President Joe Biden bangud sa pagtawag kay Russian President Vladimir Putin nga isa ka “manugpatay”, ginpanindugan gid sini liwat nga isa ka war criminal ang nasambit nga Russian leader kag dapat nga ipaidalom sa war crime trial.
“You may remember I got criticized for calling Putin a war criminal. Well, the truth of the matter—you saw what happened in Bucha…He is a war criminal. But we have to gather the information,” suno sa US president.
Suno kay Biden, nagakomiter si Putin sang war crimes kasunod sang pahayag sang Ukraine nga may 410 ka bangkay nga nakit-an sa mga lugar nga nabawi sang Ukraine matapos nga nag-isol ang iban nga Russian forces.
Lakip na diri ang 300 civilians sa Bucha.
Ang Russia ang una naman nga nagpanginwala nga sila ang may kahimuan sa pagpamatay sa mga sibilyan sa Bucha nga nahamtang sa northwest sang Kyiv.
Ginpahayag man ni Biden nga dugangan pa niya ang pagdagdag sang sanctions batok sa Russia.
