ILOILO CITY- Natumod na sang mga otoridad ang duha mga indibidwal nga ginatudlo sa likod sang natabo nga trahedya sa Nigeria kun sa diin naglupok ang isa ka oil refinery nga ginkamatay sang ginabanta 100 ka mga tawo.
Natabo ang trahedya sa Ohaji-Egbema local government area sa Imo state sa southeast nga bahin sang Nigeria.
Suno kay Bombo International Correspondent Reymond Lastiere Epacta, tumandok sang Janiuay, Iloilo kag OFW sa Lagos, Nigeria,
wala pa sang naaresto ang mga otoridad kag padayon sa gihapon nga ginaayam ang mga ini kalakip na ang tag-iya sang refinery.
Ginpahayag ni Epacta nga isa ka mass burial na lang ang ginpatigayon kun sa diin kalabanan sa mga biktima ang indi na makilal-an.
Ang paglupok sang refinery ang tuga sang pagkasunog sang duha ka fuel storage areas kun sa diin masobra sa 100 ka tawo ang nagatrabaho.
Sa subong, mas ginpabaskog sang security forces sang gobyerno ang kampanya agud matapna ang ilegal nga operasyon sang amo nga sahi sa pasilidad sa madamo nga parte sang southern Nigeria.
Apisar nga ang Nigeria ang pinakadako nga producer sang crude oil sa Africa, ang oil production capacity sini ang nalimitahan bangud sa operasyon sang illegal refineries.
