ILOILO CITY- Wala nagakadulaan sang paglaum ang Iloilo Police Provincial Office (IPPO) nga makapresentar sila sang dugang nga ebidensya batok kay anay San Dionisio, Iloilo Mayor Peter Paul Lopez kag pamilya sini angot sa kaso nga pagpatay sa negosyante nga si Claire Diergos.
Ini kasunod sang pag-dismiss sang piskalya sa murder case nga gin-file batok sa anay alkalde, asawa sini nga si Saliha Lopez alias Sally kag mga anak nga sanday Felix Paul Lopez, Carlos Paul Lopez, kag Christian Paul Lopez.
Sa interview sang Bombo Radyo kay PSMSgt Francisco Lindero Jr., spokesperson sang Iloilo Police Provincial Office (IPPO), iya ginpahayag nga sa tion nga mabaton nila ang resolusyon sang Iloilo Provincial Prosecutors Office, ila tun-an sang maid-id
Sa amo nga resolusyon, nasaad nga wala sang bastante nga ebidensya nga nagatum-ok sa pamilya Lopez gani gindismiss ang kaso.
Ang mga suspek naman nga nakitaan nga may probable cause nga pasakaan sang kaso amo sanday Raffy Sorioso alias Nonoy; Gardo Ibrahim, nga may bansag nga Gardo, Muslim, kag Yusof; kag si Ma. Rudelyn Sumbong nga kabulig ni Diergos.
Suno kay Lindero, sa subong, ginakabig sang IPPO nga isa ka positibo nga development sa Claire Diergos case ang pagrekomendar sang prosecutor nga pasakaan sang kaso ang tatlo ka iban pa nga mga suspek.
Dugang niya, tinguhaan sang IPPO nga makapangita sang mas mapag-on nga ebidensya agud ma-file liwat ang kaso batok sa pamilya Lopez.
