ILOILO CITY- Daw gintakluban sang langit kag duta ang balatyagon sang masobra 30 ka mga electricians nga wala maswelduhan sang halos tatlo na ka bulan sang ila nga kontraktor nga 13th CBC ukon Connectivity Builders Corporation sa gintukod nga condominium unit sa Megaworld, Mandurriao, Iloilo City.
Ini matapos nga wala gintuman sang kontraktor ang promisa nga ihatag ang 50% sang ila sweldo subong nga adlaw kag sa Mayo 16 naman ang 50%.
Sa interview sang Bombo Radyo kay Ronald Marfil, isa sa mga electricians, iya ginpahayag nga naruya na naman sila sa pagpadulong sa opisina sang Department of Labor and Employment (DOLE) Region 6 bangud nga ang kadam-an sa ila ang naghalin pa sa Antique kag Capiz kag wala man sang ginpadala nga abiso sa ahensya ang ila kontraktor nga indi sila makaabot subong nga adlaw.
Suno kay Marfil, sang nagtawag ang DOLE sa 13th CBC, ginpahibalo lang sa ila nga wala pa sang inugsweldo para sa mga electricians kag sa Mayo 16 nalang ihatag ang una nga 50% sang ila sweldo.
Dismayado naman sa Department of Labor and Employment (DOLE) Region 6 ang mga tagreklamo.
Suno Ronald Marfil, daw nagapabuyan-buyan man lang ang DOLE sa ila concern sa baylo kuntani nga i-pressure ang kontraktor nga bayaran sila.
Dugang niya, kaangay nga wala man sang pulos ang pagpatunga sang ahensya bangud apisar nga may sugtanay na nga natabo sa tunga sang mga trabahador kag 13th CBC, ginabalewala sila sa gihapon.
