May patigayunon nga citywide cleanup drive sa syudad sang Iloilo sa maabot nga Hunyo 4 bilang kabahin sang kampanya agud malikawan ang dengue outbreak.
Sa interview sang Bombo Radyo kay Iloilo City Councilor Allan Zaldivar, chairman sang Committee on Health sa Iloilo City Council, iya ginpahayag nga updan ini sang tanan nga mga barangay sa tanan nga distrito.
Gin-imbitar man ang Bureau of Fire Protection (BFP), religious sector, kag iban pa nga mga volunteer groups.
Sa latest record sang City Health Office, may 48 na ka mga kaso sa syudad halin sang Enero 1 tubtub sa Mayo 21 subong nga tuig — 56% nga mas manubo sa rekord sang amo man nga period sang nagligad nga tuig.
Nagapanguna sa may pinakadamo nga kaso amo ang Jaro II nga may 13 ka mga kaso.
Ang nagapanguna nga barangay nga may tagduha ka kaso amo ang Bakhaw, Mandurriao; kag Balabago, San Pedro, MH del Pilar kag Tabuc Suba sa Jaro.
Sa 48 ka mga kaso, may isa na nga napatay nga halin sa Molo.
Laban sa mga kaso amo ang mga kabataan edad 1-10 anyos.
Kadtuan pa sang konseho ang mga ospital agud nga mapa-preparar man sa posible nga senaryo kun masulit ang dengue outbreak nga naagyan na sang syudad sang nagligad nga 2019.
Apisar indi pa tuman kataas ang narekord nga kaso subong nga tuig, ginaabisuhan ang mga pumuluyo nga magkooperar gid paagi sa pagmato-mato tinlo sa palibot ilabi na ang mga areas nga posible itlugan sang lamok.
