Pabor ang isa ka barangay kagawad sa Barangay Calubihan, Jaro nga dapat may Civil Service eligibility ang tanan nga barangay officials, bangud importante ini sa pag-atubang sang ila nagkalain-lain nga responsibilidad sa barangay.
Sa interview sang Bombo Radyo kay Kagawad Felipe Salvalosa, iya ginpahayag nga may yara siya sang Civil Service eligibility rason nga nahibaluan niya ang importansya sa pag-atubang sang mga seminar, workshop, reporting kag iban pa nga buluhaton bilang isa ka barangay official.
Suno sa iya, base sa iya eksperyensya sa trabaho, kon wala sang nagakaigo nga eligibility, ihibalo ukon kaalam ang isa ka opisyal, nagadepende na lamang ang mga ini sa iban nga nakahibalo, ilabi na sa paghimo sang mga dokumento kag pag-atubang sang mga kinahanglanon sang barangay.
Pahayag pa ni Salvalosa, kinahanglan nga may ihibalo gid ang mga barangay officials sa mga dokumento pareho sang Annual Development Plan, budgeting, expenses kag income sang barangay agud masiguro ang transparency sa pagdumala sang barangay.
Dugang pa niya, mas mangin epektibo ang mga barangay official sa ila katungdanan kon may yara sila sang nagakaigo nga ihibalo kag Civil Service eligibility rason nga pabor siya nga ipatuman ini sa tanan nga barangay officials.
Matandaan nga sang damlag lang, ginsuhestyon ni Ombudsman Jesus Crispin Remulla nga dapat may yara sang civil service eligibility ang mga opisyales sang barangay kag Sangguniang Kabataan (BSK) bangud sila ang nagaserbe nga frontline sang serbisyo sang gobyerno.
