Nagmandu na ang Office of the Ombudsman nga kakason sa pwesto ang 45 ka mga personnel sang Bureau of Immigration (BI) bangud sang administrative offenses nga may kaangtanan sa pastillas scheme ukon ang pagpahanugot sang iligal nga pagpasulod sang Chinese citizens sa Pilipinas.
Sa 143 ka pahina nga consolidated decision, nakasaad nga nakit-an sang Ombudsman nga “administratively liable” ang mga opisyal sa “grave misconduct prejudicial to the best interest of the service.”
Ginpahayag man nga ang mga opisyal nga wala na sa public office antes pa man ginpaguwa ang desisyon ang dapat nga dagdagan sang multa nga katumbas sang isa ka tuig nga balor sang sweldo.
Gin-dismiss naman sang Ombudsman ang kaso batok sa 40 ka empleyado sang BI bangud sang kakulangan sang ebidensya. Ginbasura man ang kaso batok sa lima ka iban pa bangud sang lack of jurisdiction.
Matandaan nga una diri, nag-file ang ahensya sang graft charges batok sa 42 ka BI personnel nga gin-alegar involved sa pastillas scheme. Ginpahayag nga si anay Deputy Commission Marc Mariñas sang Port Operations Division ang kahimbon man sang mga immigration personnel.
Ginpahayag nga si Mariñas ang nangin kakuntyaba ni Liya Wu sang Empire International Travel and Tours agud nga hungod kag iligal nga hatagan sang “unwarranted benefits, preference, ukon advantage” ang foreign passengers partikular na ang Chinese nationals.
Gin-alegar nga nagkolekta ang grupo sang P10,000 fees sa kada passenger nga nagdangat sa kabug-usan nga P1.43 million — isa ka makabig nga paglapas sa Anti-Graft and Corrupt Practices Act.
Una naman nga ginpahayag sang government prosecutors nga gin-regulate ni Mariñas kag sang iya nga team ang nagasululod nga pasahero kag gin-distribute ang commissions sa iban pa nga nagpartisipar sa amo nga scheme.
