ILOILO CITY – Nagpangayo sang pasaylo si presidente Rodrigo Duterte sa iya nangin inisyal nga desisyon nga pahanugutan ang e-sabong operations apisar sang mga reports nga nagakaputo na ang mga nagataya kag madamo sang gin-abduct nga mga manugbulang.
Sa mga nauna nga pahayag niya, gintumod ni Duterte ang ginatos ka bilyon ka pesos nga kita sang gobyerno nagikan sa bulang.
Sa speech sang presidente sa ginpatigayon nga inspection sa main campus sang National Academy of Sports nga nahamtang sa New Clark City sa Capas, Tarlac, nagpangayo siya sang pasaylo bangud ulihi na niya ini nga narealisar.
Nadesisyunan sang presidente nga untaton ang operasyon sang e-sabong sang Mayo bangud sa finding sang Department of Interior and Local Government (DILG) nga madamo ang nagakontra sini.
Una niya nga gindepensahan ang e-sabong operations sang Marso kag Abril apisar nga madamo sang na-missing nga mga indibidwal bangud ginapahayag nga imbolbado sa amo nga industriya.
Ang kaso sang mga nagkaladula nga mga manugbulang ang wala sa gihapon naresolbar tubtob subong.
