Temporaryo nga pungkuan ni president-elect Ferdinand “Bongbong” Marcos Jr. ang posisyon bilang tiglikom sang Department of Agriculture (DA).
Mangin epektibo ini kadungan man sang pagbulos sang Marcos Jr. Administration sa Hunyo 30.
Suno sa president-elect, nakit-an niya nga ‘malala’ ang problema sa agrikultura rason nga nagdesisyon siya nga kuhaon ang amo nga katungdanan.
Matandaan nga sang nagligad nga mga semana, nagpaguwa sang paandam ang DA nga posible may matabo nga food crisis sa pungsod sa second half sang 2022 — tion nga magaumpisa man ang administrasyon ni Marcos.
Lakip sa una nga gintumod nga rason sang palaabuton nga food crisis amo ang epekto sang coronavirus pandemic, nagasaka nga presyo sang gatong, kag invasion sang Russia sa Ukraine.
Ginpahayag ni Marcos nga tutukan sang iya nga administrasyon kag preparahan ang nagapamintana nga pagsaka pa gid sang mga presyo sang pagkaon nga resulta sang “outside forces” nga nagaapekto sa suplay.
Dugangan man ang food production sa pungsod suno kay Marcos kag i-restructure mismo ang DA.
Ang pag-restructure sa actual department amo ang paagi ni Marcos agud mangin mas responsive sa pangkalibutanhon nga sitwasyon pag-abot sa food supply.
Nahingyo naman sini sa iya nga incoming Cabinet members nga maghimo sang economic forecasts para sa nabilin nga bahin sang tuig.
Lakip sa gintumod nga mga ahensya amo ang Department of Trade and Industry, National Economic and Development Authority, Department of Finance, kag ang Department of Budget and Management.
Indi ini ang una nga bes nga may presidente ang pungsod nga magapungko man bilang Cabinet Secretary.
Sa maragtas sang pungsod, ang mga former presidents nga nag-serbe man bilang Cabinet secretaries sa ila mismo termino amo sanday Carlos Garcia bilang Finance chief sang 1957; amay ni Marcos, Jr. nga si Ferdinand Marcos Sr. bilang Defense Secretary sa una nga 13 ka bulan sang iya termino sang 1965; Joseph Estrada bilang Interior Secretary halin 1998 tubtub 1999; Gloria Macapagal-Arroyo bilang acting Finance Secretary sang 2002; kag Benigno Aquino III bilang Interior Secretary sang 2010.
