ILOILO CITY – Gin-utod na sang US Supreme Court ang constitutional right to abortion sa isa ka ruling nga nagtay-og sang bilog nga Estados Unidos kag nagpauntat sang halos lima ka dekada nga constitutional protection sa isa ka pinakamalala kag mainit nga ginadebatehan nga isyu sa American political life.
Ang conservative-dominated court ang nagbaliskad sang landmark 1973 “Roe v Wade” decision nga nagaproteher sang kinamatarong sang babayi nga magpahulog nga nagasiling nga ang individual state ang makapahanugot na ukon maka-restrict sang procedure.
Sa majority opinion, ginpahayag ni Justice Samuel Alito nga ang abortion ang nagapakita sang profound moral issue kun sa diin, ang mga Amerikano ang may yara sang lain-lain nga panan-awan.
Wala naman nagpabor ang tatlo ka mga liberal sa korte.
Ang amo nga opinion ang nag-utod sang 1973 Roe v. Wade ruling sang pinakataas nga korte sang pungsod nga nagapahayag nga ang mga kababainhan ang may kinamatarong nga magpa-abort base sa constitutional right to privacy sa ila kaugalingon nga mga lawas.
Ang opinion ni Alito ang nagapakita sang iya draft opinion nga nangin subject sang extraordinary leak sang Mayo nga nagresulta sang rallies sa palibot sang pungsod kag pagpahugot sang seguridad sa korte sa downtown Washington.
May ginpahamtang na nga mga barikada sa palibot sang korte agud nga mapunggan ang mga protesters nga magtipon sa gwa matapos nga na-aresto ang isa ka lalaki sang Hunyo 8 malapit sa balay sang isa ka conservative justice nga si Brett Kavanaugh.
Ang ruling sang korte ang naglapas sang international trend sang pagpahalog sang abortion laws lakip na ang pungsod Ireland, Argentina, Mexico kag Colombia.
Ang ini nga ruling ang ginpanginbulahan naman sang Vatican’s Academy for Life.
