ILOILO CITY – Nagdangat sa 12 ang napatay lakip ang isa ka bata kag pilason ang madamo nga tawo sa pag-igo sang Russian missiles sa central Ukrainian city sang Vinnytsia.
Suno sa kapulisan, naigo ang pila ka mga opisina kag naguba ang mga residential buildings kag amo man ang isa ka medical center.
90 ka mga tawo ang nagpabulong sang amo nga tion kag ginabanta 50 sa ila ang yara sa delikado nga sitwasyon.
Suno kay Ukrainian President Volodymyr Zelenskiy, isa ini ka klaro nga akto sang terorismo bangud madamo ang napatay kag napilasan lakip na ang isa ka bata.
Ang ini nga claim ang ginpanginwala naman sang Russia nga patarasak nga gina-target ang mga sibilyan.
Ang missile ang nag-igo sa car park sang isa ka nine-storey office suno sa State Emergency Service.
Gin-akusaran naman ni Foreign Minister Dmytro Kuleba ang Russia nga nagkomiter sang panibag-o nga war crime.
Mabaskog naman nga ginapanginwala sang Russia ang amo nga mga pahayag kag ginpanindugan nga isa gid lamang ini ka “special military operation” agud nga ma-demilitarize ang Ukraine.
