ILOILO CITY – Nagpanawagan si President Ferdinand “Bongbong” Marcos Jr. sa publiko nga magpabakuna na kag mag-avail sang booster shots agud nga maproteksiyunan ang kaugalingon batuk sa severe illness bangud ang COVID-19.
Ini ang ginpahayag sang presidente sa video nga iya gin-post sa social media, isa ka adlaw pagkatapos nga nakagwa na ini sa pito ka adlaw nga isolation kasunod sang pag-acquire sini sang COVID-19 sa ikaduha nga tion.
Suno kay Marcos, wala na siya sang may nabatyag nga sintomas sang viral disease.
Kung indi siya bakunado kag wala nakabaton sang booster shot, suno sa presidente, ang ulihi niya nga pag-acquire sang COVID-19 infection ang posible nga malala.
Dugang pa niya, gamay nga hilanat kag sore throat gid lamang ang iya nga na nabatyagan.
Matandaan nga una na nga nagpositibo sa amo nga balatian ang presidente sang nagpauli ini halin sa Europe sang March 2020 kun sa diin, nagpa-ospital ini bangud nga nabudlayan nga magginhawa.
Bangud sini, iga-lunsyar sang gobyerno ang massive campaign sa booster shots kag vaccination sa bulig sang Department of Health (DOH), Department of the Interior and Local Government (DILG) kag sang Department of Education (DepEd).
Suno sa presidente, ini na ang pagpanghanda sa pagbalik sang face-to-face classes kag pagpahalog sang iban pa nga mga safety protocols.
Sa tion nga magmadinalag-on ini, magapadayon ini suno sa presidente.
Ginmanduan na niya ang DOH nga bakunahan na ang 90% sang mga senior citizen sa pungsod sa una nga 100 ka adlaw niya nga pagpungko.
Ginpahayag man niya nga indi na kinahanglan pa nga magpasar san layi sa mandatory nga pagbakuna.
As of July 13, nagdangat na sa 71.2 million Filipinos ang nabakunahan samtang 15.4 million ang nakabaton sang booster doses santo sa data sang DOH.
