Nagapamatok ang archdiocesan coordinator sang Parish Pastoral Council for Responsible Voting (PPCRV) nga i-postpone ang 2022 Barangay and SK elections.
Sa interview sang Bombo Radyo kay Msgr. Meliton Oso nga amo man ang director sang Jaro Archdiocesan Social Action Center (JASAC), iya ginpahayag nga dapat mangibabaw gid ang tingog sang pumuluyo pag-abot sa pagdesisyon kun luyag pa nila ang serbisyon sang ila nga local leaders, ukon kun ginaduso na nga islan.
Ginpahayag man ni Oso nga ang barangay amo ang basic unit sang pang-gobyerno kag diri man dapat umpisahan nga pamatian kun ano ang ginasinggit sang kadam-an.
Suno pa kay Oso, may budget na nga ginpain para sa sini nga eleksyon kag indi mahimo nga rasonan lang sang iban nga mamalidha nga gamiton anay sa iban nga prayoridad ang amo nga pondo.
Gin-athag man sini nga iya ini personal nga panindugan kag indi official stand sang PPCRV.
Nahibaluan nga ginaduso subong sa Kamara kag sa Senado nga ipaiway anay ang pagpatigayon sang Barangay and SK elections sa palaabuton nga Disyembre.
Pila sa mga gintumod rason sang mga mamalidha amo ang pagpain anay sang P8 billion nga budget para sa pagtapna sang COVID-19 surge sa Pilipinas.
May mga naga-rason man nga gin-tunga gid sang bag-o lang nagtakop nga 2022 national and local elections ang electorate rason nga dapat anay hatagan pa sang gamay nga tyempo.
Sa bahin sang Commission on Elections (Comelec), una na ini nga naghingyo sa Kongreso nga mag-desisyon na gilayon kun dayunon ukon indi ang eleksyon bangud kinahanglan man nga i-konsiderar ang preprasyon sang poll body. ##
