ILOILO CITY- Ginakalipay ni Iloilo City Lone District Representative Julienne Baronda nga nagasanto sa iya HOPE program ang priority projects nga ginplastar ni Presidente Ferdinand Marcos Jr. partikular na ang may kaangtanan sa sektor sang ikaayong lawas.
Sa labing una nga State of the Nation Address (SONA) sang presidente, pila sa gin-highlight niya ang plano nga pagpatukod sang Heart Center, Lung Center, Children’s Hospital kag National Kidney and Transplant Institute sa iban nga bahin sang Pilipinas; Establishment of a Medical Reserve Corps; National Disease Prevention Management Authority; kag Creation of the Virology Institute of the Philippines.
Sa interview sang Bombo Radyo kay Rep. Baronda, iya ginpahayag nga dako ang mabulig sini agud nga madul-ong sa tanan nga pumuluyo ang nagakaigo nga pagtatap ilabi na kun ikaayong lawas ang istoryahan.
Nahibaluan nga sa idalom sang HOPE Program ni Baronda, iya ginatutukan ang Health, Obra, Peace and Order, kag Education samtang sa iya HOPE 2.0, gindugang niya ang Housing, OFWs, Preparedness kag Environment.
