ILOILO CITY- Dako ang mahatag nga bentaha kun matigayon ang plano ni Presidente Ferdinand Marcos Jr. para sa condonation sang mga pautang kag ang isa ka tuig nga moratorium sa payments sang amortization kag interest for agrarian reform beneficiaries (ARBs).
Sa interview sang Bombo Radyo kay Atty. Sheila Enciso, Director sang Department of Agrarian Reform (DAR) Region 6, iya ginpahayag nga sa tion nga magpagwa na sang executive order ang presidente para sa amo nga moratorium, mas mabuhinan ang palas-anon sang mga mangunguma kag magamit nila ang ila kwarta sa pagpasanyog sang ila mga duta nga ginaumahan, mapadamo ang ila nga produksyon, kag mapauswag ang ekonomiya.
Suno kay Atty. Enciso, kun mapatuman ini, magalab-ot sa 654,047 ARBs ang makapanginpulos.
Una na nga gin-engganyo sang presidente ang kongreso nga magpasar sang layi nga magakakas sang palas-anon sa mga ARB nga may utang para magtutok sila sa farm productivity.
Kinahanglan ang pag-amyendar sa Section 26 sang Republic Act (RA) 6657, ukon ang Comprehensive Agrarian Reform Law of 1988, para mapanas na ang indi mabayaran nga utang sang mga ARB.
Nahibaluan nga antes ang SONA sang presidente kun sa diin niya ginmitlang ang plano para sa ARBs,nagpasa ang DAR sa presidente sang report nga may 52,000 hectares sang unused government agricultural lands nga natalana nga ipanagtag sa idalom sang EO 75.
Suno kay Enciso, sa Western Visayas, may yara pa sang 43,000 hectares sang duta ang ipanagtag kag kun kada benepisyaryo ang hatagan sang isa ka ektarya, 43,000 ka mangunguma man ang makabenepisyo.
