ILOILO CITY – Nagdangat sa masobra 160 ka mga eskwelahan ang naguba bangud sang epekto sang magnitude 7 nga linog sa Luzon.
Suno kay Michael Poa, spokesperson sang Department of Eduction (DepEd), iya ginpahayag nga nagtimbuok pa sa 164 ang numero sang mga eskwelahan nga apektado sang linog humalin sa una nga record nga yara lamang sa 35.
Wala gintumod kun sa diin nga lugar ang mga naguba nga eskwelahan apisar nga suno sa National Disaster Risk Reduction and Management Council (NDRRMC), sa initial nga report, ang mga naapektuhan nga mga eskwelahan ang nagikan sa Regions 1, 2, 3 kag sa Cordillera Administrative Region (CAR).
Ang balor sang damage sa mga eskwelahan ang nagtaas pa tubtob sa P940 million.
Suno kay Poa, gina-diskusyunan pa sang ahensya kun bala, ipaiway anay ang pagbukas sang klase sa Agosto 22 sa mga lugar nga apektado sang linog.
Apang, nagaplano na ang ahensya nga mag-provide sa mga eskwelahan sang temporary learning spaces ukon “tent-type spaces” nga magaserbe nga makeshift classrooms.
Ginpahayag man sang natungdan nga isa lamang ka manunudlo ang gin-report nga napilasana apang ini ang natabo sa isa ka seminar sa isa ka hotel kag indi sa sulod sang school campus.
Nahibaluan nga gin-activate na sang DepEd ang disaster risk reduction and management teams agud nga mag-monitor sang sitwasyon sa mga lugar nga apektado sang linog kag mag-provide sang psychological first aid sa mga apektado nga personnel kag estudyante.
