ILOILO CITY- Nagalaum ang tagdumalahan sang Iloilo Electric Cooperative (ILECO) nga i-veto ni President Ferdinand Marcos Jr. ang House Bill 10306, ang hagna nga nagaduso nga pasangkaron ang franchise area sang MORE Electric and Power Corporation (MORE Power) sa 15 ka mga banwa kag component city sa probinsya sang Iloilo.
Sa interview sang Bombo Radyo kay Engr. Jose Redmond Roquios, general manager sang ILECO II, iya ginpahayag nga maathag nga ang plano sang MORE Power ang paglapas sa Section 27 sang Republic Act No. 9136 ukon ang Electric Power Industry Reform Act(EPIRA) sa diin nasaad nga ang tanan nga existing franchises ang hatagan sang ila full term.
Sa hagna, nakasaad nga i-expand ang franchise area sang MORE Power sa banwa sang Alimodian, Leganes, Leon, New Lucena, Pavia, San Miguel, Santa Barbara, Zarraga, Anilao, Banate, Barotac Nuevo, Dingle, Duenas, Dumangas, San Enrique kag Passi City.
Kun matabo nga magasangkad ang service coverage sang MORE Power sa second kag fourth districts sa probinsya sang Iloilo, madalahig diri ang mga banwa nga gina-serbisyuhan na subong sang Iloilo Electric Cooperative (ILECO).
Suno kay Roquios, kun gin-veto sang Presidente ang House Bill No. 10554 nga nagapasangkad sang franchise area sang Aboitiz-owned nga Davao Light and Power Company (DLPC) sa Davao del Norte agud i-take over ang North Davao Electric Cooperative Inc., indi man malayo nga i-veto man sini ang MORE Power franchise expansion bill bangud nga wala ini nagasanto sa layi apisar nga co-existence pa ang ginaduso sang MORE Power.
