ILOILO CITY– Nag-umpisa na subong nga adlaw ang national “Brigada Eskwela” sang Department of Education bilang preparasyon para sa nagahilapit nga school year (SY) 2022-2023.
Ini ang may tema nga “Brigada Eskwela: Tugon sa Hamon ng Ligtas na Balik Aral” kag may katuyuan nga masiguro nga handa ang mga eskwelahan antes ang opening of classes.
Sa interview sang Bombo Radyo kay Mr. Leonil Salvilla, spokesperson sang DEPED Division of Iloilo, iya ginpahayag nga sa bahin sang probinsya, ginlunsar ini sa banwa sang Alimodian.
Suno kay Salvilla, ini nga adlaw ang pag-umpisa sang pagpatigayon sang pagpaninlo kag pag-repair sang mga kagamitan sa eskwelahan.
Apang suno sa iya, magluwas sa sini nga aktibidad, sentrohan man sang DEPED ang information campaign kag pagpabaskog sang partnership sang ahensya sa iban nga sektor agud mapat-ud ang dekalidad nga edukasyon para sa kabataan.
Sa bahin sang Iloilo National High School, ginpahayag ni Edwin Mosura, asst. school principal, nga nagpatigayon sila sang risk assessment sa palibot sang eskwelahan agud masiguro nga wala sang lugar nga mahimo pugaran sang lamok ilabi na nga nagaduging ang dengue.
Magluwas diri, gina-check man nila ang mga struktura sang kada kwarto kun mabakod pa ukon indi na ilabi pa nga duha ini ka tuig nga halos wala magamit.
