Dako nga bulig sa kampanya sang Iloilo Provincial Government nga ‘Limpyo Iloilo” ang pagpasar sang Republic Act 11898 ukon Extended Producer’s Responsibility Act of 2022.
Sa interview sang Bombo Radyo kay Atty. Cesar Emmanuele P. Buyco, Jr., pinuno sang Provincial Government Environment and Natural Resources Office (PGENRO), iya ginpahayag nga pinaagi sa sini nga layi, mahatagan na sang solusyon ang nagalala nga problema sa basura.
Suno kay Buyco, pinaagi sini, ma-require na ang tanan nga mga producers nga tungdan ang responsibilidad sa treatment kag disposal sang ila consumer products.
Ginpahayag sang natungdan nga ginamando sang layi ang konsepto sang Extended Producer’s Responsibility kag circular economy kag ginamanduan ang Department of Environment and Natural Resources (DENR) nga magplastar sang national framework para sa tanan nga klase ng basura.
Target sang layi ang recovery sang plastic wastes.
Ginamanduan man ang dalagko nga mga industriya nga magpatukod sang Extended Producer’s Responsibility program sa sulod sang anom ka bulan humalin sang nangin epektibo ang layi sang nagligad nga bulan.
Nasaad man diri ang Extended Producer’s Responsibility framework kag assessment sang kadamuon sang iban nga basura.
Nagapati man si Buyco nga maga-angkon sang dako nga pagbag-o kun mabuligan ang dalagko nga enterprises, medium kag small scale producers kag mga pamalay agud mabuhinan ang basura sa palibot.
Nagakahangawa man ang natungdan nga indi masarangan sang landfill ang tambak nga basura kun indi magbuligay ang tanan agud mabuhinan ang mga ini.
