ILOILO CITY- Naplastar na sang More Electric and Power Corporation (MORE Power), ang mga plano sa pagsugod sang expansion sang ila nga franchise area.
Ini matapos nga nag-lapse into law ang bill nga nagaduso sang pagpasangkad sang franchise area sang MORE Power sa probinsya sang Iloilo.
Sa idalom sang Republic Act 11918 ukon ang modified MORE Power franchise, nakasaad nga mahimo ini nga mag-provide sang electricity services sa Passi City, banwa sang Alimodian, Leganes, Leon, New Lucena, Pavia, San Miguel, Santa Barbara, Zarraga, Anilao, Banate, Barotac Nuevo, Dingle, Duenas, Dumangas kag San Enrique kag magalawig ini sang 25 ka tuig.
Sa interview sang Bombo Radyo kay Mr Roel Castro, presidente sang MORE Power, iya ginpahayag nga una sila nga magatukod sang pasilidad sa banwa sang Pavia nga pinaka-adjacent sa Iloilo City.
Suno kay Castro, may yara na sila sang napatindog nga mga primary posts nga kabahin na nga daan sang ila pagpanghanda sa tion nga maaprubahan ang hagna kag masuguran ang proseso sang expansion.
Gin-athag naman ni Castro nga wala pa nila nabaton ang formal communication halin sa Malacanang tuhoy sa hagna nga nag-lapse agud mangin layi.
