ILOILO CITY- Hugot nga ginapatuman sang Iloilo Provincial Government ang 4-door approach bilang panagang sa pamahog nga dala sang monkeypox virus.
Sa interview sang Bombo Radyo kay Dr. Maria Socorro Quinon, head sang Iloilo Provincial Health Office, iya ginpaathag nga ang four-door strategy amo ang framework sang National Emergency Operational Response Plan agud malikawan kag makontrol ang emerging/reemerging infectious diseases (ERID).
Suno kay Quinon, sa idalom sang 4 door strategy, may gina-implementar nga travel restrictions kag travel bans bilang isa ka separado kag primary level of defense bilang suporta sa ginapatuman nga health protocols; pagpasiguro nga ginapatuman ang screening kag quarantine sa points of entry agud mabuhinan ang risgo sang incoming travellers nga mag-trigger sang paglapta sang virus; pagpabakod sang implementasyon sang Prevent-Detect-Isolate-Treat- Reintegrate strategies agud madasig nga ma-detect kag ma-isolate ang posible kaso sang virus; kag pagpabakod sang health kag critical capacity kag systems.
Una na nga ginsiling sang mga health experts nga indi makamamatay ang monkeypox kag mas mahapos punggan ang paglapta sini kun ipaanggid sa COVID-19.
Suno pa sa mga medical experts, ang bakuna kontra sa smallpox ang mahimo magamit agud malikawan ang monkeypox.
Pila sa sintomas sang monkeypox amo ang hilanat, sakit sa ulo, muscle pain, sakit sa likod sa sulod sang lima ka adlaw kag sunod nga matuhaw ang rashes sa nawong, sa palad kag dapa-dapa.
