ILOILO CITY- Mangin lifetime na ang validity sang tanan nga birth, death, kag marriage certificates sa idalom sang isa ka hagna nga nag-lapse na kag nangin layi.
Ini amo ang Republic Act 11909 ukon ang Permanent Validity of the Certificates of Live Birth, Death, and Marriage Act nga nagasakop sang live birth, death kag marriage certificates nga gina-isyu sang Philippine Statistics Authority (PSA)(nga amo National Statistics Office sadto), kag local civil registries.
Sa interview sang Bombo Radyo kay Guimaras Lone District Representative Ma. Lucille Nava, isa sa principal authors sang amo nga layi,sa idalom sini, dumilian ang tanan nga government agencies, private companies, mga schools kag non-government entities nga magpangayo ukon magpangita sang bag-o gin-isyu nga birth, death kag marriage certificates sa ila transactions.
Suno kay Nava, ini nga layi ang makabuhin sang dugang nga gasto kag inconvenience sa pumuluyo nga magkuha liwat sang bag-o nga kopya sang sini nga mga dokumento.
Apang, gin-athag niya nga kinahanglan nga intact kag readable, kag makit-an ang authenticity kag security features sang amo nga mga dokumento.
May yara naman sang penalidad nga isa tubtob anom ka bulan nga pagkapreso ukon multa nga indi magnubo sa P5,000 apang indi maglapaw sa P10,000, ukon depende sa discretion sang korte sa sin-o man nga mapamatud-an nga guilty sa paglapas sang RA 11909.
Nahibaluan nga si Nava amo ang chairperson sang House Committee on Population and Family Relations sang nagligad nga 18th Congress.
Una na nga gin-athag sang Philippine Statistics Authority (PSA) nga wala sang expiration date ang nasambit nga mga dokumento.
Matandaan nga may mga reklamo nga pila ka ahensya sang gobyerno ang nagapangita sang dokumento nga gin-isyu sa sulod sang nagligad nga anom ka bulan.
