ILOILO CITY- Suportado sang Iloilo City Police Office ang gin-file nga hagna nga nagaduso sang pagpatuman sang nationwide curfew for minors ukon mga indibidwal nga nagaedad sang mas manubo sa 18-anyos.
Sa House Bill No. 1016 nga gin-file ni Bagong Henerasyon party-list Rep. Bernadette Herrera-Dy, dumilian ang mga menor de edad nga magtinir sa pampubliko nga lugar umpisa 10 p.m. tubtob 5 a.m.
Sa interview sang Bombo Radyo kay PMaj Shella Mae Sangrines, spokesperson sang Iloilo City Police Office kag hepe sang Police Station 1, iya ginpahayag nga tuman ka bentaha ini sa mga minors, sa ila ginikanan, komunidad kag ilabi na sa Philippine National Police (PNP) sa kampanya nga mapabilin ang kalinong kag katawhay.
Suno kay Sangrines, kalabanan sa mga ginamo ang naga-involved gid sa kabataan ilabi na ang kabahin sang mga grupo.
Apang suno sa natungdan, kinahanglan anay nga tun-an ang kabilugan nga probisyon sa amo nga hagna ilabi na ang pagpreso sa ginikanan sang mga repeat offenders nga posible nga may indi man maayo nga konsekwensiya.
Nahibaluan nga sa amo nga hagna, kun nakakumiter sang iya ikatatlo nga violation ang minor, presuhon na ang iya ginikanan sa sulod sang anom ka bulan kag/ukon multa nga ₱5,000.
