ILOILO CITY- Paghinulsol ang nabatyagan sang isa ka amay matapos nga ginbuno ang iya anak sa Brgy. Tabucan, Cabatuan, Iloilo.
Natabo ang insidente sa mismo puluy-an sang biktima nga si Ian Ediezca, 36 anyos samtang ang suspek amo si Salvador Ediezca, 69 anyos.
Sa interview sang Bombo Radyo kay PCapt Myles Dieron, Acting Chief of Police sang Cabatuan PNP, iya ginpahayag nga updanay nga nagainom-inom ang mag-amay kag posible nga may nabatian nga indi manami nga tinaga ang suspek nga ginmitlang sang biktima.
Didto na nagkuha sang kutsilyo ang amay kag ginbuno ang iya anak.
Duha ka pilas sa likod ang naangkon sang biktima nga gilayon man nga gindala sa ospital.
Sang natapungawan, daw indi naman makapati ang amay nga nahimo niya ini sa iya anak.
Nagpirma naman ang anak sang affidavit of non-interest sa pagpasaka sang kaso batok sa iya amay kag gin-settle na lang ang natabo.
