ILOILO CITY- Gindayaw sang World Health Organization (WHO) ang performance sang Iloilo Provincial Government may kaangtanan sa COVID-19 vaccination kag implementasyon sang Universal Health Care Law sa probinsiya.
Ini kadungan sang pagbisita sa Iloilo sang WHO Philippines nga ginpangunahan ni officer-in-charge Dr. Graham Harrison kag nakigsapol kay Iloilo Governor Arthur Defensor Jr. kag sa Provincial Health Office nga ginapamunuan ni Dr. Maria Socorro Colmenares-Quiñon.
Sa interview sang Bombo Radyo Dr. Quiñon, iya ginpahayag nga isa sa best practices sang probinsya nga nakabaton sang apresasyon halin sa WHO amo ang Project Nutrivac ukon ang paghatag sang family packs sang masustansiya nga mga pagkaon sa mga residente nga nagaboluntaryo sa pagpabakuna.
Suno kay Quiñon, isa man sa gindayaw sang WHO amo ang performance sang probinsya sa pagbakuna sa mga bata nga nagaedad
5-11 anyos bangud sa target nga 70 % sang 187,229 nga dapat mabakunahan, yara na sa 140,510 ang nakabaton sang first dose ukon 75 % sang kabilugan nga target sa bilog nga probinsya.
Nagpasalamat naman ang Iloilo Provincial Government sa WHO para sa tanan nga bulig nga nahatag mangin antes pa man ang pandemya.
