Nagpanguna ang Iloilo City sa may pinakamataas nga inflation sa bilog nga Western Visayas sa bulan sang Hulyo.
Base sa data sang Philippine Statistics Office (PSA) , nakarekord ang syudad sang 8.9 percent nga mas mataas sa regional average nga 6.9 percent kag national average nga 6.4 percent.
Ini ang resulta sang pagtaas sang presyo sang pagkaon nga gin-updan man sang pagsaka sang presyo sang gatong.
Sa interview sang Bombo Radyo kay Mayor Jerry Trenas, iya ginpahayag nga ginatinguhaan subong sang syudad nga mapahagan-hagan ang impact sang mataas nga inflation.
Suno sa alkalde, dako ang bulig sang pila ka program sang ahensya sang gobyerno kaangay sang cash-for-work program sang Iloilo City Social Welfare and Development Office (CSWDO) kag Tulong Panghanapbuhay sa Ating Disadvantaged / Displaced Workers (TUPAD) sang Department of Labor and Employment (DOLE).
Dugang sang alkalde, nagahulag man ang city government sa pagpasanyog pa sang nutritional status sang kabataan paagi sa pagpatigayon sang feeding programs.
Magluwas diri, nakig-partner man ang syudad sa Iloilo Bakers Association para sa skills training sa idalom sang Technical Education and Skills Development Authority (TESDA) kag madamo pa nga mga programa.
Nahibaluan nga sa data sang PSA, halin sa 6.2 percent sang Hunyo, nagtaas ang inflation rate sang Western Visayas sa 6.9 percent sang Hulyo.
