ILOILO CITY- Ginapreparahan na sang Provincial Board Members League of the Philippines (PBMLP) ang mangin tikang may kaangtanan sa ginapaabot nga implementasyon sang Mandanas-Garcia ruling.
Ang Mandanas-Garcia ruling ang resulta sang petisyon nga ginhimo ni Batangas Governor Hermilando Mandanas kag former Bataan Governor Enrique Garcia Jr. sa Supreme Court tuhoy sa local government shares sa internal revenue allotment (IRA) kun sa diin suno sa petitioners, ang LGU shares ang dapat maglakip sang tanan nga national taxes.
Gin-affirm sang Supreme Court nga ang LGUs ang mangin entitled sa “just share” sa tanan nga national taxes nga ginakolekta kag indi lang ang taxes nga halin sa Bureau of Internal Revenue (BIR).
Sa interview sang Bombo Radyo kay Majority Floor Leader Iloilo 4th District Board Member Domingo Oso Jr. ng nagaserbe man nga interim Secretary General sang Board Members League of the Philippines, iya ginpahayag nga apisar may yara sang dugang nga 30 percent sa budget allocation sang halos tanan nga Local Government Unit, apang indi sila pabor nga diktahan ukon manduan sang iban nga ahensya sang gobyerno kaangay sang Department of Interior and Local Government (DILG) ang LGU kun sa diin gastuhon ang ila pondo.
Suno kay Oso, sila sa PBMLP nagapanindugan nga kun ginamanduan ukon ginapilit kon paano usaron ang pondo, isa ini ka paglapas sa prinsipyo sang fiscal autonomy sang isa ka LGU.
Gindugang sini nga may yara sang ginapaabot nga Memorandum Circular gikan sa DILG kag Department of Budget and Management nga magaplastar kon sa diin usaron ang pondo kag kun iduso ini nga memorandum circular, ang PBMLP mismo ang magapanguna sa pagpetisyon tuhoy diri.
Nahibaluan nga sa subong, ang mga LGUs nagakuha sang ila IRA gikan sa 40% sang national internal revenue taxes nga ginakolekta sang BIR.
Una na nga ginmando sang DILG sa tanan nga national government agencies (NGAs) kag LGUs nga magpreparar sang Devolution Transition Plans (DTPs), bilang requirement sa idalom sang implementasyon sang Mandanas-Garcia ruling.
