ILOILO CITY- Ginakabig nga isolated case sang legal consultant sang Panlalawigang Pederasyon ng Sangguniang Kabataan (PPSK) President ang ginkaulamiran nga krimen sang SK Federation President sang San Miguel, Iloilo nga suspek sa pagluthang sa isa ka lalaki nga nakaaway niya sa social media.
Ang suspek amo si Mikhail Tadifa, 24, residente sang Barangay 11 samtang ang biktima amo si Dyezrelle Malaygay, 30, residente sang barangay San Jose, San Miguel kun sa diin natabo ang pagpangluthang.
Sa interview sang Bombo Radyo kay Atty. Bryan Cerebo nga nagpungko man sadto bilang Iloilo SK Federation Vice President, iya ginpahayag nga
dismayado siya sa natabo kag ginakondendar niya ini, kag ini pa lang ang labing-una nga tion nga may isa ka SK official nga na-involve sa kaangay nga kaso.
Suno kay Cerebo nga sa pihak sini, nagapati siya nga nagakadapat sa gihapon nga itib-ong ang maayo nga hinimuan sa komunidad sang iban nga mga SK officials nga sinsero sa ila pagpangalagad bilang mga opisyal.
Nagpanawagan naman ini kay Tadifa nga magkooperar na lang sa mga kapulisan kag magsungka nalang agud atubangon ang panumbungon batok sa iya.
