ILOILO CITY- Nakapatigayon na ang Iloilo City Government sang fogging sa tanan nga mga eskwelahan sa Syudad sang Iloilo bilang tikang kontra dengue samtang nagahilapit na ang pagbukas sang face to face nga klase sa Agusto 22, 2022.
Sa interview sang Bombo Radyo kay Iloilo City Mayor Jerry Treñas, iya ginpahayag nga padayon ang pagtaas sang kaso sang dengue sa syudad gani kinahanglan nga maproteksyunan gid ang mga estudyante sa eskwelahan agud indi sila mabiktima sang amo nga balatian.
Suno kay Treñas, may fogging and misting man sa mga barangay nga ginakabig hotspot areas kag may clustering of cases.
Nagpanawagan man ini sa tanan nga pumuluyo kag mga barangay officials nga mangin responsable gid sa ila palibot agud nga indi mangin pugad sang dengue mosquito ang ila mga ugsaran kag lugar.
