ILOILO CITY- Pilason ang isa ka asawa matapos ginbuno sang iya hubog nga bana sa isa ka barangay sa banwa sang Calinog.
Sa interview sang Bombo Radyo kay Police Staff Sergeant Joven Aldabon, imbestigator sang Calinog Municipal Police Station, iya ginpahayag nga
natabo ang insidente matapos ginsilingan sang asawa ang bana nga luyag na niya makigbulag diri.
Sa ila mainit nga pagbaisay, nagkuha sang kutsilyo ang bana kag ginbuno ang asawa nga napilasan sa magtimbang nga kamot sang gin-gamit niya ini bilang panagang.
Nagtambag pa ang manghod sang biktima apang ginbuno man ini sang suspek.
Nadala naman sa ospital ang mag-utod kag hilway na ang kahimtangan samtang natigayon man nga maaresto ang suspek.
Sa subong, ginahulat pa sang Calinog PNP ang desisyon ang desisyon sang asawa kun pasakaan sang attempted parricide ang iya bana kag ang desisyon sang utod sang biktima kun pasakaan sang attempted homicide ang suspek.
