ILOILO CITY- Gina-finalize na sang Iloilo City Government ang patigayunon nga deployment sa ginalauman nga paggutok sang trapiko kag pagdamo sang mga tawo sa palibot sang syudad kadungan sang pagbukas sang School Year 2022-2023 sa Agusto 22.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga may i-assign nga mga traffic enforcers sa palibot sang mga buluthuan agud nga ma-manage sang maayo ang pagtabok-tabok sang mga tawo sa dalan pagwa-sulod sa eskwelahan ilabi na sa tion sang peak hours.
Suno kay Conlu, may mga katapo man sang Iloilo City Police Office nga magahatag seguridad sa pumuluyo.
Pahayag ni Conlu, sa subong, nagapakig-angot man sila sa Land Transportation Franchisind and Regulatory Board (LTFRB) angot sa pag-isyu sang Provisional Authority sa mga Public Utility Jeepney(PUJs) para maka-augment sa pag-akomodar sang dako nga volume sang pasahero.
Dugang pa sang PSTMO head, padayon man ang clearing operation agud mangin hilway gikan sa obstructions ang mga dalanon para sa mas tayuyon ang dalagan sang trapiko.
Dumilian man ang mga ambulant vendors nga magplastar sa kilid sang mga eskwelahan bangud magapagutok ini sa dalan.
May arrangement naman ang syudad sa mga buluthuan angot sa mga private vehicles nga nagadul-ong kag nagasugat sang estudyante kun sa diin indi pagpahanugutan ang mga ini nga mag-park sa atubang sang mga eskwelahan.
